Sua Edizioak argitaletxeak Burgos, las montañas más bellas gidaliburua plazaratu berri du. Bertan bereziki eder eta liluragarri diren 26 mendi batu ditu, denak Burgosen. Hasi Losa haranean eta Arlanza ibaiko ibarreraino, Ebro Garaia, Lora bailara edo Obarenes mendietan barrena eramango gaitu.

Horrela, zerrenda aukeratu horrek herrialdeko mendiguneetako tontorrik garaienetaraino igoko gaitu. Horrez gain, bidean ur-jauzi ikusgarriak, herrixkak, haitzarteak, leizeak, gazteluak eta baseliza erromanikoak azalduko zaizkigu ezker-eskuin. Izan ere, gidaliburu horretan, txangoen deskribapen zehatzez gain, ohiko mapa eta argazkiez aparte, esku-eskura edukiko dugun ondare naturala eta kulturalaren gaineko jakingarriak aurkituko ditugu.

Egileak, Txomin Uriarte mendizale adituak alegia, segida eman dio gidaliburu honekin 2001ean argitaratu eta egun agortuta zegoen “Montes de Burgos, todas las cumbres” liburuari. Ahalegin itzela egin du gidaliburua bikaina izan dadin. Irakurleak, seguru gaude, igarri egingo du.