Euskal Herria Liburuak bildumak ale berria dakar, “Excursiones por crestas y cordales”, mendizaleen gozagarri. Edukiak piztuko du interesa, mendilerroetako bizkarretatik 36 ibilbide dakartzalako. Eta itxurak liluratuko gaitu, txangoak egin bitartean ateratako argazki zabalek zain dauzkagun paisaia itzelak aurkeztuko dizkigute eta.
Egileek, Joana Garcia eta Txemi de los Doloresek alegia, ibarrak zeharkatu dituzte, lepoetara igo eta tontorrik tontor ibili dira. Gandorrik gaitzenak saihestu egin dituzte, igarobide gaiztoenak egin behar ez izateko. Eta haien ibilera horiekin lan itzel hau osatu dute, guk ere lurralde menderakaitz horien berri izan dezagun eta, nahi izanez gero, bertatik bertara ezagutu ditzagun, gure indarrek, jakintzak eta trebeziek eramaten gaituzten lekuraino, behinik behin.
Ibilbide bakoitzak deskribapena, fitxa teknikoa, mapa eta, esan bezala, egileek egindako argazki zoragarriak dakartza. Mendilerroz mendilerro ibili dira herrian barrena: Ordunteko mendiak, Gorobel, Toloño, Kodes, Anboto, Adarra, Behorlegituturru, Saioa, Kartxela…
Txango zerrendako izen asko oso ezagunak dira mendizaleen artean. Beste batzuk, ostera, gutxitan aipatzen dira: Okabro-Saroberri, Sesiarte-Agirao, Gahalarbe… Jakina, klasikoak ere badaude (Aizkorri, Aiako Harria, Iparla….), liburu itzela osatu arte.
Euskal Herria liburuak 