“Fauna gida”, Euskal Herriko natura ezagutzeko ezinbesteko lanabesa

Posted on 03/12/2024 by Euskal Herria bilduma

Azal deigarri horren atzean lan mardula dakar Sua Edizioak-eko Guías Natura saileko ale berriak. Euskal Herriko Fauna Gida liburu mamitsua da oso, jakingarriz beteta eta zer pentsatua ematen duena. Harrituko gara gure natura eremuetako animalia sorta zabala ezagutzean, gure paisaiak nola sortu diren jakitean eta espezieen azken hamarkadetako joeren berri jasotzean. Egilea, Iker Elosegi, Euskal Herri osoari begira jarri da gure natura zertan den azaltzeko. Emaitza kitzikagarria da.

Liburu honen xedea gure herrian bizi diren animalia basatiekiko jakin-mina piztea da. Horretarako naturazale jarrera hartzea proposatzen du. Ikusi edo entzun baino gehiago, basapiztiei begiratzea eta aditzea da kontua, non eta nola bizi diren ulertzeko, haiekin partekatzen dugun planeta zati honetako ekosistemetan duten lekua ulertzeko. Orotara, 150etik gora animalia aipatzen baditu ere, liburua ez da espezie-katalogo bat. Animalia horien gaineko jakintza zabaltzera, beste espezie batzuk ezagutzeko gogoa piztera eta bizi garen ingurumena hobeki ulertzeko gakoak ematera dator.

Iker Elosegi (Baiona, 1965), biologia eta agronomia ikasketak egin zituen eta gaur egun Euskal Herriko Laborantza Ganbarako koordinatzailea da. LIburuan erakutsi duen bezala, gure herriko bazter guztietako natura ondo baino hobeto ezagutzen du eta etorkizunari begira jarraitu beharreko ildoei buruz ere gogoetak partekatu ditu. Hortaz, Euskal Herriko naturaz janzteko eta hausnartzeko lanabes bikaina da Elosegik ondu duen liburu hau.

Argazki andana bat lagun, liburua Guías Natura sailean argitaratu da. Aurretik bertan dira, euskaraz, Euskal Herriko Zuhaitzen Gida eta Euskal Herriko Hegaztien Gida. Fauna gidako lagin bat utzi dugu lerroon azpian, nahi baduzue ikusi.

EHkoFAUNAgida_sareak Deskargatu

“Ama Lur miresgarria”, euskal naturaren edertasun harrigarria

Posted on 09/02/2024 by Euskal Herria bilduma

Erantzun

Segurtasun osoz esango dugu: Euskal Herria Liburuak bildumako ale berriak aho bete hortz utziko gaitu. Ama Lur miresgarria. Landare eta animalia harrigarriak liburua begietatik sartuko zaigu eta hitzekin sorginduko gaitu. Bere txikian, euskal naturak zazpi animalia, landare, onddo eta fenomeno sinesgaitz gorde ditu. Liburu honetan azalduko zaizkigu, Joseba del Villarren argazki zoragarrien eta Amador Prietoren testu bikainen bidez.

Landareak, oihanak, txoriak, ugaztunak, loreak, migrazioak, bizkarroiak, basamortuko biztanleak, zirina behar duten malbak, zohikaztegiak… Berrehun orrialdeko bidaia kitzikagarri honek lehenengo orrialdetik bertatik liluratuko gaitu. Eta, gainera, Euskal Herriko naturaren nondik norakoak ulertzeko gakoak jasoko ditugu. Gure begiak argazkietara iltzatuta geratuko dira, hain dira ederrak eta adierazgarriak. Eta argazkietatik testuetara igarotzean, berdin jarraituko dugu, azalpen argiak, erakargarriak eta txundigarriak tartekatu dituelako.

Euskal naturaren alderdi ezezagunak argitara ekarri dituztenak formazioz biologoak dira. Joseba del Villar natura-argazkilaria da, hamaika liburu eta dibulgazio-lanetan parte hartutakoa. Amador Prieto botanikan espezialitatuta dago eta testuen ardura hartu du. Biek egiten dute lan euskal naturaren kontserbazioaren alde.

Liburu hau Euskal Herria Liburuak bilduman euskaraz argitaratu den bigarrena da. Iaz ireki genuen bidea, Mikel Arrizabalagaren Aiako Harria parke naturala eta Jaizkibel liburuarekin.

“Rutas para observar aves”, hegaztiak ikustera joateko bidelaguna

Posted on 06/10/2023 by Euskal Herria bilduma

Erantzun

Gure ibilaldietan egin ditzakegun jarduera kitzikagarrienetako bat hegaztiak ikustea da. Gustura ibiliko gara, inguratzen gaituen naturarekin bat egiteko aukera emango digu eta, hegaztien edertasunaz gozatzen garen bitartean, gu ere naturaren parte garela sentituko dugu berriro. Zeregin interesgarri hori proposatzen digu Euskal Herria Liburuak bildumako ale berriak. Rutas para observar aves liburua Jonathan Rubines eta José María Fernández-García adituek atondu dute.

Bere baitan, liburuak hogeita hamar ibilbide bildu ditu. Euskal Herri osoan zehar banatzen dira eta mota guztietako hegazti eta ekosistemak jaso ditu: ur-hegaztiak, kostaldekoak eta itsasokoak, haitzetakoak, mendietakoak, oihanetakoak, estepakoak eta pasean igarotzen direnak. Horrela, gure herriko paisaia sorta zabala jaso ez ezik, naturaren edertasunaz eta hegaztiez gozatzeko lekurik egokienak ezagutuko ditugu.

Jakina, liburuak arlo ornitologikoan Euskal Herrian nabarmendu diren lekuetara eramango gaitu, hasi Organbidexka lepo libretik (Zuberoa) eta buka Urdaibai Bird Center (Bizkaia) edo Ataria (Gasteiz) bezalako begiraleku berrietan, Pitillasko aintzira, Nafarroako haitzarteak eta kostaldeko itsadarrak bezalako klasikoak ahaztu gabe.

Ibilbide bakoitzak hegazti espezie nagusi bat jaso du. Hori deskribatuta dakar eta,gainera, ibilbidearen mapa eta argazki ikusgarriak. Irudi ederrok liburua lasai ikuskatzera gonbidatuko gaituzte lehenengo eta kanpora hegaztiek ikustera joatera gero. Ondo ibili!