“Euskal Herriko bira”, bederatzi etapetako itzuli zoragarria autoz

Itzuli liluragarri baten proposamenarekin dator oraingoan Sua Edizioak: Euskal Herriko Bira. Autoz egiteko ibilbide handia. Gure herria ipar-hego eta ezker-eskuin ibiltzeko gonbitea da. Bederatzi etapatan 1.130 kilometro egin eta itsasoa, goi mendiak, basamortua, labore-sailak, Erdi Aroko herriak, oihan sarriak, baserri bakartiak eta hiri modernoak bertatik bertara ikusi. Esperientzia kitzikagarria, Euskal Herria ezagutuz gozatzeko.

Etapa bakoitza, batez beste, 120 kilometro luze da. Norberak nahi duen lekuan has dezake, jakina, baina liburuak Bilbo hartu du abiapuntu. Bertatik Baionaraino helduko gara itsasertzari estu-estu atxikita, Donostia, Biarritz eta beste leku zoragarri askotan gelditu ondoren. Jarraian, Pirinioetako isurialde biak ibiliko ditugu, ipar aldekoa lehenengo eta hego aldekoa gero, Iruñera iritsi aurretik. Nafarroako erdialdetik Zangoza, Erriberri, Gares edo Lizarra bezalako mugarriak bisitatuko ditugu, Arabako Errioxan sartu orduko. Mendialdea, Lautada, Gasteiz, Aiaraldea eta Enkarterri zeharkatu eta Ezkerraldetik itzulia osatuko dugu. Euskal Herriaren zazpi aurpegi ikusiko ditugu.

Liburuak jakingarri guztiak ematen dizkigu: zer ikusi edo zer egin leku bakoitzean, nondik jo, baita bidean agertuko zaizkigun beste tentazio batzuen berri ere. Beraz, guk erabakiko dugu autoa non eta noiz gelditu, zerekin gozatu, zenbat denbora eman…

Liburua Jordi Bastart kazetari adituak idatzi du. Bidaia-liburu andana idatzita dago (tartean Sua Edizioaken En Ruta bildumako Grand Tour de Catalunya) eta ondo baino hobeto ezagutzen du Euskal Herria. Gainera, Sua Edizioak-ek ere bere ekarpena egin du Euskal Herriko Bira. Autoz egiteko ibilbide handiak euskal kulturaren ikuspegia ere jaso dezan. Elkarlan horretatik jaio da ibilbide liluragarri hau. Ondo ibili!

“Productos del país”, bertoko produktuak eta plan itzelak

Euskal Herria Liburuak bildumako liburu berria desberdina da. Hala aldarrikatzen du bere azal iradokitzaile eta dotoreak. Ez, ez zaio ahaztu naturan barrena egiteko ibilbide zoragarriak ekartzea. Eta ez dio uko egin Euskal Herria zertan den ezagutzera emateari. Zeregin biak ederki bete ditu, bildumak ohi duen kalitatearen bermeaz. Aldea beste leku batean dago, edukietan alegia, herrian barrena hara hona eramango gaituelako, naturan txango ederrak egitera, bai, baina baita lehenengo sektoreko harribitxi gozoenetako batzuk nork, non eta zelan sortzen dituen ikustera. Hona hemen Alberto Muroren Productos del país liburuko proposamenak.

Orotara hogeitasei proposamen dira, tartean direla olibondoen itzalpean picnica egitea, desagertzeko zorian egon zen Euskal Xerria arrazako txerri haztegia bisitatzea edo gaztainen sekretuak ezagutzea. Ideia sorta askotaz zabalagoa da: artaldeak, gaztandegiak, upeltegiak, olio-errotak, kontserba lantegiak, lekaleak… Lerroon azpian Productos del país liburuko erakusgarri txiki bat utzi dugu, denon esku. Hor daude, besteak beste, ibilbide guztien zerrenda eta horietako bat oso-osorik. Ondo ibili eta on egin!

“Productos del país”, gastronomia eta ibilbideak elkartzen dituen liburu ederra

Ardoak, olioak, gaztak, babarrunak, esnea, eztia, behi eta txerri haragia, barazkiak, gaztainak… Euskal Herriko produktuak dira liburu ezberdin eta, aldi berean, klasiko honen protagonista nagusiak. Ezberdina da, bai, liburu azal dotorea ikustea besterik ez dago, dena Tolosako babarrun eta Ibarrako pipar. Ezberdina Productos del país. Rutas y visitas liburuak lehen sektoreko ekoizleen lantokietaraino eramango gaituelako. Baina baita klasikoa ere, bisitaldiak biribiltzeko inguruetatik ibilbide politak proposatzen dituelako.

Izan ere, ideia da olio-errota batera joan ostean olibondoen itzalpean picnica egitea, edo euskal xerriak nola hazten dituzten ikusi eta gero mendi-buelta ederra egitea. Gaztak zelan egiten dituzten ikusiko dugu, Nafarroako Erriberako kontserbak nola egiten dituzten, barazkien eta lekaleen produkzioaren nondik norakoak bertatik bertara ezagutuko ditugu… eta bisitaldi horien ostean (edo aurretik) ibilbide zoragarriak egingo ditugu inguruetako mendietatik.

Egilea Alberto Muro da, mendizale, gidari, kazetari eta argazkilari aditua. Euskal Herria goitik behera ibilita dago. Liburuan kalitate handiko testu eta argazkiak uztartu ditu. Horien bidez berehala piztuko zaigu liburuak dakartzan hogeitasei proposamenen gaineko jakin-mina.