Hamabost dira “Planes de fin de semana” [astebururako planak] liburuak proposatzen dizkigun ideiak. Baina ideia bakoitzaren baitan hamaika proposamen tentagarri sartzen da, asteburua (edo aisialdirako edozein egun) gogoangarria bilakatu arte.
Horrela, ideia bakoitzaren deskribapenean interesgune eta aktibitate andana agertzen da. Kultur bisitaldiak, gastronomia, familian egiteko moduko planak, enoturismoa, abentura kirolak eta beste hamaika iradokizun zerrendatzen dira, nork bere gustuko plana osa dezan. Gainera, atal gehienetan zehatz-mehatz deskribatutako mendi irteera ere sartu du egileak, bisita nagusiaren osagarri (edo, beharbada, alderantziz).
Liburuak hiru proposamen nagusi dakartza herrialdeko. Aurkibidean azalduko zaizkigu, besteak beste, Iratiko oihanaren Zuberoako atala, Bastida herri ardogile zoragarria, Urdaibain barrena egiteko plan itzela, historiaz betetako Deierri eta Gesalatz nafar ibarretako paisaia ederrak eta Aloña mendiaren gerizpean gordetzen diren zoko-moko zoragarriak (Oñati).
Astebururako plan kitzikagarriok Alberto Murori zor zaizkio. Berak sortu, deskribatu eta argazkiz dokumentatu ditu. Muro aspaldiko kolaboratzailea da Sua Edizioak-en eta Euskal Herria goitik behera eta ezker-eskuin ibilita dago.
Euskal Herria liburuak 