Bizitzak aldean dakartzan plazeretako bat Euskal Herriaren geografian barrena lasai ibiltzea da, urratsez urrats, tipi-tapa, inguruko edertasunez horditu arte. Inguru hori Lapurdi, Nafarroa Beherea eta Zuberoako paisaiak badira, txangoak merezi du, zalantzarik ez. Horrela erakutsi du Gorka Lopez mendizale adituak 50 rutas senderistas por Iparralde liburu berrian. Berria eta bikaina, Ipar Euskal Herriko lekurik ederrenetan barrena eroso ibiltzeko mota guztietako ibilbideak proposatzen dizkigu eta.

Gorka Lopezek berak liburuko sarreran nabarmendu duen bezala, Ipar Euskal Herriak hamaika paisaia eder biltzen ditu bere baitan. Goizean bortuetako tontor elurtuetara
igo gaitezke, eguerdian oihan zoragarrian mokadua jan, eta garaiz ibiliko gara ilunabarraz itsasertzean gozatzeko.

Lapurdi, Nafarroa eta Zuberoara jotzen badugu libur hau gidari hartuta, gailur, oihan, landa, arroila, ibar eta itsaslabarretan barrena ibiliko gara: Ehujarre, Ardanabi, Intzola, Harpea, Holtzarte, Pagaburu, Larla… Beti patar edo malda handirik gabe eta goiz batean egiteko moduan. Alegia, gu guztiok egiteko moduko ibilbide ederrak.